Ginkompirmar ni Bacolod City Lone District Congressman Greg Gasataya nga nagcommit na ang Overseas Workers Welfare Administration (Owwa) nga bayaran na nila subong nga semana ang bills sa mga hotels kag inns sa syudad sang Bacolod City nga gingamit bilang quarantine facilities sang repatriated overseas Filipino workers.
Suno kay Gasataya, iya gin-istorya si OWWA Administrator Hans Leo Cacdac agud diskusyunan ang status sang bill sa mga hotel sa Bacolod City.
Ginpasiguro man ni Cacdac nga bayaran sang OWWA ang balayran sini nga nagabalor sang P25 milyon.
Nahibaluan nga inisyal na nga nagbayad ang OWWA sang P10 milyon sa mga hotels kag inns apang may yara pa sila sang balanse nga P25 million.
Nagalaom man ini nga ang isa ka semana nga moratorium sa pagbalik sang mga OFWs sa syudad ang makahatag sa ila sang tion nga mabayaran ang nabilin nga balayran agud malikawan ang problema sa mga tag-iya sang hotel kag inns.
Madumduman nga una na nga gin-aprubahan ang hingyo sang City Government sang Bacolod nga isa ka semana nga moratorium sa pagbalik sang mga OFWs.
Ginpadangat naman ni Councilor Israel Salanga, chairman of Action Team on Returning OFWs, nga indi na magbaton ang iban nga hotel kag inns sang mga OFWs bangud sa mga balayran sang OWWA.
Kapin 21 ka mga hotels kag inns sa Bacolod City ang gingamit bilang quarantine facilities para sa mga repatriated OFWs kun sa diin sabat sang OWWA ang accommodations.
