Nagpalab-ot sang concern ang pila ka mga hotel owners sa provincial government bangud tubtob subong wala pa gid sila nabayaran sang Overseas Workers Welfare Association (OWWA) para sa accomodation sang mga repatriated overseas Filipino workers.
Sa interview sang Bombo Radyo Bacolod kay Atty. Rayfrando Diaz, ginpahayag sini nga mangin dako nga problema pananglitan nga mag-untat sa pagsuporta ang mga hotel owners.
Suno diri, may yara sang iban nga mga hotel nga nagpabutyag nga indi na sila magbaton sang mga repatriated OFWs kun indi pa makabayad ang OWWA sa ila.
Nahibaluan nga nagadangat sa kapin P4 million ang balaydan sang ahensya sa isa pa lang ka hotel.
Dugang pa sini, bisang partial payment wala pa gid sang may nabaton ang mga hotel owners.
Ginkumpirmar man ni Diaz nga ila na ini ginpalab-ot sa OWWA Region 6 agud gilayon nga mahatagan sang solusyon kag indi mahuy-an ang probinsya kag indi man madudla ang mga tag-iya sang hotel nga nagsalig nga bayaran sila.
Apisar sini, ginpasalig naman ni Diaz nga nakahanda gihapon ang provincial government nga mangbaton sang mga returning OFWs apang pananglitan nga indi na makasarang ang OWWA nga magpatinir sa ila sa mga hotel, yara naman ang mga quarantine centers nga ginhanda sang probinsya.
Suno sa provincial administrator, kuntani ila lang anay maintindihan ang sitwasyon kag batunon ang kun ano lang ang masarangan sang gobyerno.
