Nagpang-abiso ang tagpamaba sang Bacolod City Police Office nga hulaton lang ang order nagikan kay Police Region Office 6 Regional Director Brig. Gen. Rene Pamuspusan kun sin-o ang magabulos kay anay BCPO Director Police Col. Henry Biñas matapos ini ginrelieve kag ginre-assign sa PNP Drug Enforcement Group kahapon.
Sa interview sang Bombo Radyo kay BCPO spokesperson Police Lt. Col. Ariel Pico, nagpang-abiso ini sa mga pumuluyo nga indi anay magpati sa mga nagalapta nga istorya tuhoy sa kun sin-o ang magabulos kay Biñas bilang city director kag hulaton nalang ang opisyal nga mando nagikan sa PRO-6.
Aminado man si Pico nga mangin siya ang nagulpihan sang iya nabatian kahapon nga igare-assign na ang anay city director.
Suno diri, antes mag-formation kahapon, nagpatigayon sang paghinun-anon si Biñas sa mga personnel sang BCPO kun sa diin ginkumpirmar sini nga magabalik na siya sa Camp Crame.
Nagpasalamat man ini sa kooperasyon sang mga personnel kag nangayo sang pasaylo sa mga pulis nga iya naakigan apang ginpa-intindi sa mga ini nga kun may yara sang sala nga nahimo ang isa ka personnel, kinahanglan ini nga disiplinahon.
Gindayaw man sini ang performance sang city director halin sang nagtake-oath ini sang Enero 2019 bangud madamo ini sang mga kontrobersyal kag dalagko nga kaso nga ginpangatubang kaangay na sang isyu sang pamilya Yanson tuhoy sa Vallacar Transit Inc.
Gindugang man sang tagpamaba ang natigayon nga Masskara Festival sang tinalikdan nga tuig kun sa diin malapit 90% ang gin-nubo sang crime incidents kag suno sa iya, ini ang makabig nga pinakamalinong nga selebrasyon sang festival.
Sa karun nga wala pa sang may gintalana nga magbulos kay Biñas, suno kay Pico, automatic nga si Deputy City Director for Administration Police Lt. Col. Levy Pangue ang magatake-over bilang officer-in-charge tubtob may yara na sang ibutang ang regional office.
