P1.2 milyon ang balor sang illegal nga droga nga nakumpiskar sa buybust operations nga ginpatigayon sang City Drug Enforcement Unit kag Bacolod City Police Station 7 sa Brgy. Alijis, Bacolod City kahapon sang hapon.
Sa interview sang Bombo Radyo Bacolod kay BCPO director Police Colonel Henry Biñas, ang suspetsado ang ginkilala kay Mohaisin Magondacan, 25 anyos kag residente man sang nasambit nga lugar.
Nakuha sa iya paghinakop ang lima ka elongated heat sealed transparent sachet sang suspected shabu kag 20 ka mga dalagko nga heat sealed transparent plastic sachet sang suspected shabu.
Ang nakompiskar nga gina-alegar illegal nga droga ang ginabanta nga nagabug-at sang 100 gramos.
Sa karun, si Magondacan ang nakahunong sa Bacolod City Police Station 7 kag pagapasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.
