Nagdangat sa masobra P1.3 million ang balor sang suspected shabu nga narecover sa lima ka persona sa drug buybust operation nga ginpatigayon sa Purok Lubi, Barangay 3, Bacolod City alas-4:33 kaina sang kaagahon.
Interview with CDEU Head Police Lt Col Antonio Benitez
Ang mga naaresto amo sanday Michael Murillo alyas Toto Murillo ukon Tantan, 21 anyos, high value individual, subject sa nasabitan nga drug buybust operation, single, kag wala sang trabaho; utod sini nga si Rafael Murillo alyas Negro, 37 anyos, single, wala sang trabaho; Jonathan Geva alyas Jonathan, 22 anyos, single, wala sang trabaho, lunsay mga residente sa nasambitan nga lugar; kag si Boyet Jundos alyas Teyob, 32 anyos, single, wala sang trabaho, nga residente naman sang Prk SP Village, Brgy Pahanocoy, Bacolod City.
Ang mga suspect ang lunsay may mga anay nga kaso na may kaangtanan man sa illegal nga droga, kag may isa nga may anay kaso nga frustrated homicide.
Ang operasyon ang ginpatigayon sang City Drug Enforcement Unit sang Bacolod City Police Office, kun sa diin ila narecover ang isa ka knot tied transparent plastic bag kag 26 ka transparent plastic sachet nga naga-unod sang suspect shabu kalakip na ang buybust item.
Ang suspected shabu ang ginabanta nagabug-at sang 200 grams nga may standard drug price nga P1,360,000.
Sa interview sang Bombo Radyo Bacolod kay CDEU Head Police Lt Col Antonio Benitez, ginsuguran nila ang monitoring sang may nagluntad nga shooting incident sa area kun sa diin nangin biktima ang utod man ni Michael nga si Alyas Inday.
Si Michael, ang notorious nga nagabaligya sang illegal nga droga sa ila nga lugar, kag ginapili nga magpatigayon sang transaksyon sa ila balay agud indi tuman ka expose sa gwa.
Ang mga suspect ang nakahunong na sa Bacolod Police Station 2 kag natalana nga mangatubang sang kaso sa paglapas sa Republic Act 9165 ukon Comprehensive Dangerous Drugs Act of 2002.
