Arestado ang duha ka lalaki matapos narekober ang ginapatihan shabu nga nagabalor sang masobra P1.5 million sa ginpatigayon nga buy-bust operation sang Bacolod City Drug Enforcement (CDEU) sa Purok Mag-tiayon, Brgy. 10, Bacolod City pasado alas-11:00 kagab-i.
Ginkilala ang mga suspek nga sanday Gresil Flores alyas “Toto”, 44-anyos, wala sang asawa, welder kag residente sa Purok Mag-tiayon, Brgy. 10, Bacolod City kag si Bonie Tamesis, 43-anyos, kasado, painter kag residente sa Brgy. Alyansa, Bago City.
Ang entrapment operation ang ginpatigayon sang Bacolod City Drug Enforcement Unit (CDEU).
Nakuha sa ila paghinakop ang 13 ka heat sealed transparent plastic sachets kalakip ang buybust item; tatlo ka knot tied transparent plastic sachet sang suspected shabu; isa ka one thousand peso bill kag iban pa nga non-drug items.
Ginpahayag sang CDEU nga ang standard drug price ang nagabalor sang P10,000 kada gramo, gani nagdangat ang kabug-osan nga balor sang mga narecover sa P1,564,000.
Ang suspek ang yara na subong sa kustodiya sang Bacolod City Police Office (BCPO) kag mangapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
