Malapit P1.4 million nga balor sang suspected shabu ang nakumpiskar sa buybust operation nga ginpatigayon sang Bacolod Police Station 8 sa isa ka high value individual sa Barangay Singcang Airport, Bacolod City, Huwebes sang gab-i.
Sa interview sang Bombo Radyo kay Police Major Joery Puerto, station commander sang Bacolod Police Station 8, sang tinalikdan pa nila ginamonitor ang suspetsado nga si Mark Daniel Angas, 39-anyos, residente sang Barangay 14, Bacolod City.
Huwebes sang gab-i, ila ini ginpatigayunan sang buybust operation kag nakuhaan sang 32 ka mga dalagko nga heat sealed transparent plastic sachet sang suspected shabu nga nagabug-at sang 205 gramos kag may estimated market value nga P1,394,000.00.
Suno kay Puerto, santo sa ila imbestigasyon, yara sa sulod sang Bureau of Jail Management and Penology (BJMP) – Taculing ang drug lord nga ginakuhaan sini sang illegal nga druga kag nagavideo-call pa sa iya.
May yara na sang identity ang mga otoridad sa nasambit nga drug lord kag sa karun ila pa ini ginverify kag ginaimbestigahan kun ngaa may cellphone sa sulod sang selda.
Suno diri, may yara sang bagsakan sang madamo nga drugs kag si Angas amu ang nagadul-ong sa mga pusher sang supply.
Yara sa kapin tunga sa kilo ang ginakuha sini apang sang ginpatigayon ang buybust operation, 1/4 na lamang ang bilin bangud napangdispose na ang iban.
Si Angas ang bulag sa asawa kag may duha ka mga kabataan nga yara sa iya kustodiya.
Sa karun nakahunong na ang suspetsado sa Bacolod Police Station 8 kag natalana nga pasakaan sang kaso nga paglapas sa R.A. 9165 ukon Comprehensive Dangerous Drugs Act of 2002.
