P1.7 million nga suspected shabu ang nakumpiskar nagikan sa isa ka 19 anyos nga estudyante sa ginpatigayon nga drug buybust operation sa Purok Tahong, Brgy. 2, Bacolod City, kahapon sang hapon.
Sa interview sang Bombo Radyo Bacolod kay Police Captain Paul Vincent Pendon, station commander sang Bacolod City Police Station 2, nagpatigayon sila sang joint buybust operation ang Bacolod Police Station 2 kag PNP Drug Enforcement Group kun sa diin natigayon nadakpan si Arnold Caso, 19 anyos, residente sang nasambit nga lugar.
Suno sa station commander sang Bacolod Police Station 2, narekober nila gikan kay Caso ang 51 ka medium heat sealed transparent sachet sang suspected shabu, ginabanta nga may kabug-aton nga 250 grams kag may standard drug price nga P1,734,000.00.
Suno kay Pendon, ginkasa ang buybust operation paagi sa informant kag pagvalidate man sang ginhatag nga mga impormasyon.
Suno diri, may yara pa si Caso sang upod apang siya ang nabaklan kag nadakpan sa ginpatigayon nga buybust operation.
Ginpahayag man sang station commander nga magacoordinate pa sila sa Barangay 2 para sa dugang nga background sang arestado.
Suno kay Pendon, santo sa ila nga impormasyon ang nadakpan ang ginadagdagan sang dako nga balor sang illegal nga druga.
Ginpahayag man sini nga may nabaton man sila nga impormasyon nga madamo sang nagakadto sa balay nga ginpatigayunan sang buybust operation kag isa sa nakabal amo ila confidential informant.
Nakahunong na sa karun ang suspek sa Bacolod Police Station 2 kag magapangatubang sang kaso nga paglapas sa RA 9165 ukon Comprehensive Dangerous Drugs Act of 2002.
