Ginkwestyon sang Makabayan bloc ang P1-billion nga pagtaas sang confidential kag intelligence funds (CIF) sa bersyon sang Senado sa proposed 2026 national budget.
Suno sa report, ang confidential funds ang nagtaas halin sang P4.37 billion 2026 National Expenditure Program (NEP) tubtob P5.25 billion sa Senate’s version of the General Appropriations Bill (SGAB).
Suno kay ACT Teachers Party-list Rep. Antonio Tinio nga ang CIF ang madali lamang nga abusuhon bangud sa kakulangan sang transparent audit.
Ginpahayag sini nga ang ini nga mga pondo ang dapat nagaagi sa klaro nga audit process.
Samtang nagsaka man ang intelligence funds sang P6.4 billion sa NEP tubtob P6.63 billion sa SGAB.
Suno diri, wala sa gihapon nakita sang Macabayan Bloc ang bersyon sang proposed 2026 spending plan nga gin-aprubahan sang bicameral conference committee.
Nagpangabay ang mga ini kay President Ferdinand Marcos Jr. nga i-veto ang confidential kag intelligence funds kun ipirmahan niya na ini sa 2026 national budget.
Dugang pa sang Makabayan bloc, ang Office of the President ang nakabaton sang pinakadako nga alokasyon para sa confidential kag intelligence funds sa masunod nga tuig nga naglab-ot sang P4.56 billion.
