P100,000 ang ginatanyag nga padya para sa makahatag sang impormasyon natuhoy sa ginahamtangan sang Communist Party of the Philippines – New People’s Army (CPP-NPA) nga si Arnel Tapang nga suspetsado sa pagpamatay sa northern Negros.
Si Tapang ang isa sa mga suspetsado sa masobra 10 ka mga insidente sang pagpangluthang sa banwa sang Toboso kag Calatrava gani siya ang ginhatagan sang focus sang mga militar.
Suno kay Col. J-Jay Javines, commander sang 79th Infantry Battalion sang Philippine Army, ang reward ang nakolekta pinaagi sa pledges sang mga stakeholders kag mga donors.
Nagalaom si Javines nga pinaagi sa padya mas makakuha pa ang mga miliyar sang mas maayo nga mga impormasyon batok kay Tapang nga anay katapo sang nadismantle na nga Northern Negros Front kag nagapatigayon sang mga pagpamatay sa banwa sang Toboso kag Calatrava.
Paathag sini nga apisar na dismantle na ang Northern Negros Front, ang mga nabilin nga members sini ang nagapatigayon gihapon sang recovery kag recruitment efforts sa tinutuyo nga mabawi ang lugar.
Samtang padayun naman ang pagbantay sang tropa sang gobyerno agud maseguro nga indi na liwat makabangon ang makawala nga grupo.
Dugang pa ni Javines nga subong nga bulan sang Agosto, tatlo ka mga shooting incidents sa Barangay Marcelo, Calatrava ang ginapatihan kahimuan sang grupo ni Tapang.
Sa pihak nga bahin, nagapanawagan naman ang 79th IB sa iban pa nga mga stakeholders nga sarang makadugang sa balor bangod nagapati ini nga mas mapadasig pa ang pagtipon sang impormasyon partikular na kun magdangat sa P300,000 ang reward money.
Hugot nga nagapati ang mga militar nga yara lang sa Calatrava ang suspetsado kag nagalibot lang sa lugar bangod wala man ini sang iban nga mahimo palagyuhan.
Si Tapang ang residente sa Barangay Bandila, Toboso, apang ginalantaw nga nagpalagyo ini sa Calatrava ilabi na nga gintukuran sang Forward Operating Detatchment (FOD) sang mga militar ang iya nga puluy-an.
