BACOLOD CITY — Natalana na nga iga-turnover sang provincial government sang Negros Occidental ang financial assistance sa pamilya sang mga suldado nga napatay samtang nagapakig-away sa Marawi City.
Ini matapos nga gin-aprubahan na sang Sangguniang Panlalawigan (sang Miyerkules) ang bulig pinansyal sang provincial government sa pamilya sang mga killed in action sa Marawi siege.
Kabug-usan nga P100, 000 ang gin-aprubahan sang SP kag ini ang tulungaon sa pamilya sang lima ka mga suldado nga nagkalamatay ukon tag-P20, 000 kada isa.
Suno kay Board Member Salvador Escalante, chairman sang committee on finance sa provincial board, ang financial assistance ang kuhaon sa PAGCOR trust fund.
Madumduman nga kalakip sa mga nagkalamatay sa inaway amo sanday Staff Sgt. Joseph Villanueva sang La Castellana; Corporal Ariel Arquio sang Cauayan; Corporal Arjelito Baroa sang San Carlos City, PFC Ramonito Occeña sang Sipalay City kag Sergeant Murphy Bolagon sang Murcia.
Suno kay Escalante, igatalana pa ni Governor Alfredo Marañon Jr. ang petsa sang turnover sang bulig pinansyal sa himata sang mga nagkalamatay.
