Nakabaton na sang P10,000 nga financial assistance ang 800 pa ka mga katapo sang fisherfolk kag farmers organization pati na mga pamilya nga apektado sang tinalikdan nga El Niño Phenomenon sa Bacolod.
Suno kay Councilor Thaddy Sayson, chairperson sang Committee on Agriculture ang financial assistance ang sa idalom sang Presidential Assistance for Farmers, Fisherfolks, and Families (PAFFF).
Suno diri, sang nagpadulong sadto sa ciudad ang presidente may ginbilin ini nga P10 million kun sa diin amo ang ginpanagtag sa karun.
Ginpahayag man sini nga ginvalidate liwat sang barangay ang listahan sang mga benepisyaryo kun sa diin nalakip diri ang mga nagpadulong sadto sa opisina ni Bacolod City Mayor Alfredo “Albee” Benitez bangud wala makabaton sang ginpanagtag nga ayuda sang nagpadulong ang presidente.
Matapos ang validation, ginmando man sang alkalde ang pagrelease sang ayuda sa mga beneficiaries.
Madumduman nga sadtong bulan sang Hunyo, ginpangunahan ni Presidente Ferdinand Marcos Jr., ang pagpanagtag sang masobra P83 million nga ayuda halin sa PAFFF sa Negros Occidental kalakip na ang ciudad sang Bacolod.
