Magadangat sa P11 billion ang budget nga kinahanglan inkaso magsaka sa Alert Level 4 ang status sang Bulkan Kanlaon.
Sa interview sang Bombo Radyo Bacolod kay Office of Civil Defense Region 6 Director Raul Fernandez, sa ginpatigayon nga press briefing sa Negros Occidental Capitol, isa sa napamangkot kun pila ang kinahanglanon nga budget inkaso maglala ang sitwasyon.
Sa ila nga assessment, magadangat sa 13 ka banwa kag ciudad ang maapektuhan kun may magluntad nga major eruption kag magsaka sa Alert Level 4 ang status sang Bulkan.
Kalakip sa ginakahangaw-an ang ashfall, lahar kag lava flow, kasubong man ang pyroclastic density current.
Sa 30-days computation, magadangat sa P11 billion ang kinahanglan nga budget, apang paathag sini nga sila ang kutob lamang sa computation kag wala madiskusyunan kun diin magakuha sang budget.
Covered na sa nasambitan nga budget ang pagkaon, puluy-an, kag iban pa nga kinahanglan sang mga evacuees.
Naghatag naman sang go signal ang National Government sa Task Force Kanlaon para sa pagpreparar sang evacuation effort kag planning para sa worst case scenario.
Sa ila nga estimate, magadangat sa 29 mil ka pamilya ukon halos 100 mil ka indibidwal ang maapektuhan kun may magluntad nga major eruption.
Ang OCD ang hugot man nga nagakoordinar sa mga mahimo maapektuhan nga LGUs para sa pagplastar sang ila mga evacuation centers.
Gin-offer naman sang Negros Occidental Provincial Government ang Panaad Park and Stadium agud mangin evacuation center inkaso nga kinahanglanon.
Samtang ang Negros Oriental Provincial Government ang may-ara man sang “Plan Exodus” para sa kaangay nga scenario sa Canlaon City kag katupad nga mga banwa.
Isa man sa ginabantayan sang OCD upod sa PHIVOLCS kag PAGASA, ang tiyempo bangod ang madamol nga pag-ulan ang makapalala pa sa sitwasyon inkaso magdungan sa major eruption.
