BACOLOD CITY-Arestado ang duha ka mga lalaki sa buybust operation sang Police Station 2 sa Purok katilingban, Brgy. 40, Bacolod City kagab-i.
Antes mag alas-9:00 kagab-i sang ginpatigayon ang buybust sang Station 2 sa pagpamuno sang commander nga si Police Major Sherlock Gabana kun sa diin nadakpan ang subject nga si Jonh Rey Melendez alyas Boyboy, 39-anyos kag ang kustomer sini nga si Honesto Adera, 41, sang Puentevella Subdivision, Brgy. Taculing kag isa ka lyamador.
Nakuha sa paghinakop ni Melendez ang duha ka bulto kag dugang pa nga 4 ka elongated sachets sang suspected.
Samtang nakuhaan naman sang isa ka elongated sachet sang suspected shabu si Adera.
Ginabanta nga nagabug-at sang 10 gramos ang nakumpiskar nga ginasuspetsuhan iligal nga druga gikan sa duha kag ginabanta nga nagabalor sang P150,000.
Samtang ginpahayag ni Gabana, nga bag-o lang nakaguwa sa prisuhan si Melendez sa kaso may kaangtanan man sa iligal nga druga apang naka-avail ini sang plea bargaining agreement.
Nahibaluan nga sakop na sang Station 6 ang Brgy. 40 apang sa karun wala naman sang boundary ang pagpatigayon sang buybust operations sang napulo ka police stations sa ciudad.
Si Melendez ang nadakpan sang Station 2 bangud man sang mga nakuha nila nga impormasyon gikan sa mga nauna na nga nagkaladakpan sa ila operasyon.
