Aprubado na sang Senado ang P17.4-billion nga pondo sang Department of Agrarian Reform (DAR) para sa 2026, suno kay Secretary Conrado Estrella III nga nagpalab-ot sang pagpasalamat sa mga senador.
Suno kay Estrella, ang bag-o nga pondo ang magapabakod sa mga programa sang ahensya para sa seguridad sa pagpanag-iya sang duta, kag mga serbisyo nga magahatag suporta sa mga mangunguma.
Gin-aprubahan ni Senate President Vicente C. Sotto III ang budget sa ginpatigayon nga deliberasyon sang Nobyembre 18, nga gin-sponsporan ni Senator Sherwin Gatchalian kag gintambungan ni Estrella kag iban pa nga opisyal sang Department of Agrarian Reform.
Kasunod sini nagpalab-ot sang pagpasalamat ang Department of Agriculture (DA) sa mga senador matapos aprubahan ang P184.1-billion nga budget sang ahensya para sa 2026.
Ini ang isa ka tikang nga may katuyuan nga pabaskugon ang food security kag national development.
Sa Plenary debate, nagpasalig man ang mga senador nga bukas sila nga dugangan pa ang pondo sang DA sa nagapalapit nga bicameral conference committee.
