Nagadangat sa kapin P2.3 million nga balor sang iligal nga druga ang nakumpiskar sa separado nga operasyon batok sa iligal ng druga sa Negros Island, Lunes nga adlaw.
Nabawi sang City Drug Enforcement Unit sang Bacolod City ang P1.8 million nga balor sang ginasuspetsuhan nga shabu sa buy-bust operation sa ciudad.
Subject sa operasyon si alyas “Buktot” nga suno sa kapulisan madugay na nila nga gintinguhaan nga madakpan.
Nagpamalibad naman nga maghatag sang pahayag ang suspetsado nga ginkabig high-value target sng kapulisan.
Arestado man ang isa pa niya ka upod.
Samtang, lima naman ka mga kalalakin-an ang nadakpan sa buybust operation sa Silay City.
Nakuha sa ila ang 10 tanan ka sachet sang suspected shabu nga nagabalor sang P315,000.
Sa Dumaguete City, Negros Oriental naman, arestado ang isa ka 37-anyos nga lalaki nga yara sa drug watchlist sang kapulisan.
Nakuha sa iya ang 10 ka sachet sang suspected shabu nga ginabanta nagabalor sang P170,000.
Kaso sa pagbayolar sa Republic Act 9165 ukon Comprehensive Dangerous Drugs Act of 2002 ang ipasaka batok sa mga nagkaladakpan.
