Umpisahan na sang Negros Occidental Provincial Government ang pagbaligya sang tag P20 kada kilo nga bugas subong nga semana.
Suno kay Governor Eugenio Jose “Bong” Lacson, ang pagbaligya sang nasambit nga presyo sang bugas ang una nga patigayunon sa banwa sang Pulupandan.
Suno kay Lacson, 50 ka sako sang bugas ang una nga ibaligya sa weekend.
Gin-athag naman sang gobernador nga indi sila maghulat sang bugas nga nagikan sa National Food Authority ukon NFA.
Suno sa gobernador nga ang P20 per kilo rice program ang ipatuman kaupod ang pareho nga grupo sang mga irrigators ukon ang Federation of Irrigators’ Association Central Negros – Bago River Irrigation System (FIACN-BRIS), Inc. nga nagabaligya sang bugas nga P25 kada kilo.
Suno diri, tubtob sa karun wala sila sang nabaton nga komunikasyon nagikan sa NFA angot sa available supply sang bugas.
Dugang pa sini nga mahimo nga ginhatagan sang prayoridad sang nasambit nga ahensya ang Bacolod City Government bangud isa ini sa mga LGU nga nauna sa pagpatuman sang P20 per kilo rice program.
Matapos ang Pulupandan, ipatuman naman sa iban naman nga LGU ang programa nga kaangay nga “rolling store”.
Kapin sa P3 million naman ang iga-subsidize sang Provincial Government sa operational expenses sang FIACN-BRIS para sa nasambit nga programa.
Ginpasiguro naman ni Lacson nga nakahanda sila nga magbakal sang bugas sa NFA para sa pagpadayon sang programa kun may available na nga supply.
