Wala pa gihapon sang may nakabaligya sang P20 per kilo rice program sa Negros Island Region.
Nahibaluan nga ang Visayas ang pilot area sa implementasyon nga na-umpisahan antes pa ang May 12 Midterm Elections.
Apang sa pihak sini, wala pa natapos sang mga local government units ang mga requirements agud makapatuman.
Sa interview sang Bombo Radyo Bacolod kay Department of Agriculture – Negros Island Region officer in charge Jose Albert Barrogo, ginahulat pa nga makapasar sang resolusyon ang Sangguniang Panlalawigan sang Negros Occidental sa ipagwa nga pondo.
Madumduman nga P33 ang pagbakal sa bugas gikan sa National Food Authority (NFA) samtang isubsudized naman sang National Government kag local government units ang P13 agud ini ang mabaligya sa balor nga P20 kada kilo.
P6.50 naman ang talabunan sang kada LGU sa kada kilo sang bugas, gani ang Negros Occidental Provincial government ang natalana nga mag-aprubar sang P10 million nga budget para sa programa.
Sa pihak nga bahin, nagcontact naman si Barrogo sa Food Terminal Incorporated nga amo ang naganegotiate sa mga LGUs kag amo ang nagahatag sang go signal sa NFA kun ano ka damo ang volume sang bugas nga ipagwa.
Natumod nga ang Bacolod City ang may-ara na sang purchase order, apang sa karun, wala pa ini nakabatun sang notice gikan sa Bacolod City government kun san-o magasugod sa pagbaligya.
