Nagpagwa sang 200 mil pesos nga bounty money ukon cash reward ang ciudad sang Cadiz para sa madasig nga pagdakop sa suspetsado nga naghimulos sa 13-anyos nga babayi samtang padulong sa eskwelahan sang nagligad nga semana.
Sa interview sang Bombo Radyo Bacolod kay Mayor Salvador Escalante, ginpakamaayo nila nga maghatag sang cash reward sa sin-o man nga makatudlo sa presensya sang suspetsado nga si Marlon Beboso Jr., 25-anyos nga pakaduha sang madrasto sang biktima.
Nahibaluan nga wala na nakit-an ang suspetsado pagkatapos sang insidente.
Ginakabig karon nga serial rapist kag killer si Beboso matapos makit-an sa ginpatigayon nga pagpangusisa sang otoridad nga may mga kaso ini nga nakomiter sang menor-de-edad pa lamang siya.
Si Beboso ang ginapahayag may kaso sang rape sa Iloilo kag Kabankalan City.
Samtang, nagapanawagan naman si Escalante sa bug-os nga Negros Occidental kag sa mga kaiping nga mga probinsiya nga buligan ang otoridad sa pagdakop sa suspetsado bangud tuman ini ka delikado kag agud malikawan nga may mabiktima pa ini nga iban.
Sa karon, nagpalapta na sila sang litrato ni Beboso agud madali ini madakpan.
