Liwat nagpanawagan ang grupo sang mga taxi drivers sa Bacolod City sang patas nga pagtamod gikan sa gobyerno.
Ini kasunod sang ginpatigayon nga General Assembly sang Samahan ng mga Taxi Drivers sa Bacolod, nga gin-updan sang kapin 500 nga miyembro.
Sa interview sang Bombo Radyo Bacolod kay Ronald Allan Pelaez Salgado, leader sang transport group, sila ang nagpatigayon sang signature campaign, kag naghimo sang affidavit nga ipadala kay President Ferdinand “Bongbong” Marcos Jr, sa Land Transportation Franchising and Regulatory Board (LTFRB) Head Office, Senator Erwin Tulfo, kag Department of Social Welfare and Development (DSWD) Secretary Rex Gatchalian.
Suno kay Salgado, ginakwestyon nila kun ngaa tubtob sa karun wala nakalab-ot sa ila ang P5,000 nga fuel subsidy.
Pahayag sini nga puro lamang pasalig ang LTFRB sa ila.
Suno diri, dekada na siya nga nagadala sang taxi, kag nagaserbe nga breadwinner sang ila pamilya.
Dugang pa niya nga kompleto man sila sa papelis, gani para sa iya nagakadapat man sila nga magbatun sang ayuda.
Dugang nga ginlain sang ila buot sang mahibaluan ang pasalig sang LTFRB nga paghatag sang P20,000 kada bulan para sa kada unit sang modernized jeepney bilang bulig sa ila balayran sa bangko.
Apang suno diri, ini ang kaangay nga insulto para sa ila, bangod ang modernized jeepney lamang ang ginalukod, samtang kaangay nga bulag kag bungol na sa ila nga panawagan.
Pahanumdom ni Salgado nga dapat patas ang paghatag sang ayudad sa mga public utility drivers bangod ang kwarta nga ginagamit ang gikan man sa mga tax payers.
