Ginpabalik sang presidente sang Association of Barangay Councils (ABC) sang Bago City, Negros Occidental ang P20,000 nga scholarship grant nga nabaton sang bata sang Punong Barangay sang Barangay Tabunan, Bago City.
Madumduman nga gin-ulan sang nagkalain-lain nga komento ang Punong Barangay sang Barangay Tabunan bangud nga isa sa lima nga nakabaton sang P20,000 nga educational assistance sa idalom sang Bawat Barangay Makikinabang Program (BBMP).
Sa interview sang Bombo Radyo Bacolod kay Punong Barangay Jovito Gahaton sang Barangay Ma-ao, Bago City, sang Pebrero pa lang sila ang ginpapasa na sang pangalan para sa scholarship grant sa idalom sang Bawat Barangay Makikinabang Program (BBMP).
Suno kay Gahaton, sang Pebrero wala pa sang guidelines ang nasambit nga scholarship grant kag ang Punong Barangay sang Barangay Tabunan nga si Maria May C. Suarez. ang may yara sang graduating sa college nga bata gani ginlista niya ini.
Apang bangud ini ang elected official dapat nga mag-inhibit siya.Bangud sa paglakip sang Punong Barangay sa iya bata bangud na-qualify man ini madamo sang negatibo nga komento sa facebook.
Agud nga matapos na ang isyu, ginpabalik ni Gahaton kay Suarez ang P20,000 kag nakadepende na kay Liga ng mga Barangay-Negros Occidental President Hon. Richard Julius L. Sablan kun anhon ang ini nga kantidad bangud ang pondo ang nag-agi man sa probinsya kag gin-download lamang sa mga Barangay.
Suno kay Gahaton, gin-ako man ni Suarez nga bangud kulang ang ila oras kag wala man sang nagsabat sa ila panawagan sa pagpangita sang beneficiaries bangud ginadalian ang pagpasa sang lista ginbutang sini ang mismo nga iya bata.
