Na-aprubahan na sa Sangguniang Panlungsod sang Bacolod City ang tig-P20,000 nga Service Recognition Incentive (SRI) para sa tagsa ka permanent employees sang City government.
Sa interview sang Bombo Radyo Bacolod kay Councilor Jude Thadeus “Thaddy” Sayson, chairman sang Committee on Finance and Appropriations, gin-aprubahan na ang SRI sa ila nga session sang Miyerkules.
Nagdangat sa P30 million ang budget para sa kapin 1,400 nga mga regular employees.
Paathag ni Sayson nga sa guidelines sang Department of Budget and Management, wala madala ang Job Order sa makabatun.
Sa karun nagahulat pa ang mga ini kun magapagwa sang guidelines ang DBM para sa JOs.
Paathag ni Sayson nga sila ang indi basta-basta makapagwa sang cash gikan sa kaban sang ciudad nga wala sang proper guidelines bangod ini ang mahimo nga bawion.
Bangod indi naman masukot sa tion nga mahatag na sa mga empleyado ang kwarta, ini ang mangin salabtun sang opisyales sang ciudad.
Gani ginasegurado gid sang mga ini nga may napagwa na nga guidelines ang DBM antes magrelease sang pondo.
Samtang ang ciudad ang may makuhaan naman sang pondo kag nakahanda nga magrelease kun may ipaggwa nga guidelines, apang kun wala, ini ang ibalik lamang sa City treasury.
Suno diri, mahimo nga mapasulod na sa tagsa ka bank accounts sang mga empleyado ang P20,000 nga SRI sumugod sa Lunes.
