P24 million nga balor sang suspected shabu ang nakompiskar sa tatlo ka mga suspetsado sa ginpatigayon nga buybust operation sa Phase 4, Purok Dapiles, Barangay Handumanan, Bacolod City kaina sang aga.
Sa interview sang Bombo Radyo Bacolod kay Police Lt. Thurslie Castillo, pinuno sang Regional Drug Enforcement Unit (RDEU), ginpahayag sini nga ginabanta P24 million ang balor sang nakompiskar nga masobra tatlo ka kilo nga suspected shabu.
Suno kay Castillo, masobra isa ka bulan ang pagsurveillance nila sa mga suspetsado kag natigayon nga madakpan subong nga adlaw.
Suno kay Castillo, antes pa man nila nasulod ang gin-alegar nga bodega sang suspected shabu nabaklan nila si Richard Luñares alyas Pirot gamit ang buybust money nga ginabanta P14 mil kag nakatigayon ang mga operatiba nga makasulod matapos nga gintanyagan nila nga madamo pa sila sang baklon.
Gani narecover sang mga otoridad ang mga binulto sang shabu nga nakasulod sa isa ka dako nga bag kag nakahanda na nga ipangdistribute.
Ginpahayag man ni Castillo nga ang target sang operation amo ang babayi nga ginkilala kay Carline Lunares, isa ka High Value Individual (HVI) kag yara man sa Top Priority List sang mga otoridad.
Ginkilala ang duha ka iban pa nga mga suspetsado nga sanday Nestor Briniosa nga gina-alegar nga naulamid sa operasyon kag si Richard Lunares isa ka runner sang iligal nga droga.
Nakuha sa paghinakop sang mga suspetsado ang isa ka transparent heat sealed plastic sachet sang suspected shabu nga buybust item, 40 transparent heat sealed plastic sachet sang suspected shabu kag anum ka knot tied transparent plastic sachet sang suspected shabu.
Ginpahayag man sini nga may nagluntad pa nga commotion gani wala na dayun ang iban pa nga transaction.
Suno kay Castillo, wala man sang rekorded nga kaso ang target nila nga si Charlene Luñares apang ang runner sini nga si Richard ang may yara na sang kaso nga paglapas sa RA 9165.
Ginpahayag man sini nga sa Muntinlupa naghalin ang supply sang suspected shabu.
Aminado man ang Team Leader nga nabudlayan man sila bangud wala sila sang contact sa Barangay kag sa hepe sang Police Station 10 bangud bag-o ini.
Sa karun, nakahunong na sa Bacolod City Police Station 10 ang mga suspetsado.
