Nagpain ang Bacolod City Government sang P29 million para sa pagbakal sang school supplies nga libre nga ihatag sa mga elementary pupils para sa School Year 2025-2026.
Sa interview sang Bombo Radyo Bacolod kay Councilor Al Victor Espino, chairperson sa Committee on Education sa Sangguniang Panlungsod, nagadalagan na ang proseso kag yara na sa bids and awards committee sunod sa requirements sa paghatag sang libre nga school supplies sa idalom sang Republic Act 9184.
Nagadangat sa 72,000 ang mga enrollees sang nakaligad nga school year halin Grade 1 tubtob Grade 6, gani kaangay nga numero man ang ila ginprepararahan kag naghatag lamang sang allowance.
Ang opening sang klase ang natalana sa Hunyo 16.
Nagalaom si Espino nga makabakal na sa supplier sa 1st ukon 2nd week sang Hunyo agud gilayon nga mapanagtag.
Suno diri matapos sang bidding process, magakinahanglan pa sang 21 ka adlaw para sa pagproseso.
Ang ila bidding budget ang naga-umpisa sa P15 million, apang ini ang madugangan pa basta may-ara lamang sang available nga pondo.
Madumduman nga tinalikdan nga tuig, envelope, 10 ka notebooks, papel kag lapis ang ginhatag nga school supplies, apang subong nga tuig, plano nila nga maghatag man sang bag.
Suno kay Espino, nakaligad nga tuig ang budget ang nagikan sa general fund, apang sa karun ginpahanugutan na nga makuha sa special education fund ang budget sa libre nga school supplies.
