Kapin 3.2 million pesos nga balor sang suspected shabu ang nakumpiskar sa buybust operation nga ginpatigayon sang Police Station 8 sa 26-anyos nga iloy sa Purok Lison, Barangay 1 ciudad sang Bacolod kagab-i.
Ginkilala ang subject sa operasyon nga si Arlene Arnaiz, residente sang Purok Tilapia, Barangay 3, Bacolod City kag ginakabig nga high-value target.
Sa interview sang Bombo Radyo Bacolod kay Police Major Charles Gever, hepe sang Police Station 8, ginpahayag sini nga nakabaton sila sang impormasyon nga nagahimo sang iligal nga aktibidad si Arnaiz.
Matapos ma-validate, nagpatigayon sila gilayon sang buybust operation.
Nakuha sa paghinakop sang suspetsado ang isa ka big heat-sealed transparent plastic sachet kag dugang pa gid nga tatlo ka mga plastic sachet sang suspected shabu.
Ginabulubanta nga nagabug-at sang 270 grams ang ginasuspetsuhan iligal nga druga nga nagabalor sang P3.2 million.
Suno kay Gever, may impormasyon na sila kun sa diin nagakuha sang suplay sang iligal nga druga si Arnaiz.
Nakahunong ini sa karon sa Police Station 8 kag natalana nga pasakaan sang kaso sa paglapas sang Republic Act 9165 ukon Comprehensive Dangerous Drugs Act of 2002.
Samtang, arestado man ang 18-anyos nga lalaki sa buybust operation sang Police Station 2 sa Brgy. 3 ciudad sang Bacolod kagab-i.
Ginkilala ang suspetsado kay Moises Cuadra kun sa diin nakuha sa paghinakop sini ang 16 ka sachets sang suspected shabu nga ginabanta nagabalor sang P20,000.
Suno sa commander sang Police Station 2 nga si Major Sherlock Gabana, isa ka street level target ang suspetsado.
Dugang pa sang commander, 16-anyos pa lang si Cuadra nagaduso na ini sang iligal nga droga santo man sa mga impormasyon nga nakuha nila sa mga himata sini nga ila nagkaladakpan sa nauna na nila nga mga buybust operations.
