P3.5 million nga balor sang iligal nga druga ang nakumpiskar sa buybust operation nga ginpatigayon sang Silay City Police Station sa bulig sang Talisay City Police Station sa Menlo Village Phase 3, Barangay Zone 10 ciudad sang Talisay kahapon.
Subject sa operasyon ang duha ka mga babayi nga ginkilala kanday Ma. Del Mar Parojinog, 22-anyos kag Joana Lusabia, 20-anyos.
Kalakip man sa mga nadakpan amo sanday Romel Ferrer, 25-anyos; Jason Parojinog, 19-anyos nga bana ni Ma. Del Mar; kag Homark Orquia, 27-anyos nga lunsay mga residente sang Barangay Mambulac, Silay City kag ginapatihan miyembro sang Divinagracia Drug Group.
Suno sa station commander sang Silay City PNP nga si Police Major Rollie Pondevilla, natigayon nga makuha sa paghinakop sang mga suspetsado ang dose ka mga heat sealed transparent plastic sachet sang suspected shabu lakip na ang buybust item kag duha pa gid ka bulto sang suspected shabu nga nagabalor sang P3.5 million.
Suno sa hepe, madugay na nila nga ginmonitor ang mga suspetsado.
Una nga transaksyon kuntani ang patigayunon sa ciudad sang Silay tubtob nga nahisugtan nga patigayunon ini sa Talisay.
Dugang pa ni Pondevilla, nagpakig-angot sila sa Talisay City PNP agud mangin madinalag-on ang operasyon.
Samtang, nagapati naman si Negros Occidental Police Provincial Office director P/Col. Romeo Baleros nga posible inug-deliver ang nasambit nga mga shabu sa Cadiz City kag sa Cauayan bangud sa palaabuton nga festival sang duha ka mga lugar.
Dugang pa ni Baleros, mabudlay nga ma-locate si Michale Divinagracia nga ginatudlo lider sang Divinagracia Drug Group bangud santo sa ila monitoring wala na ini sa ciudad sang Silay.
Sa karon, priso ang mga suspetsado kag natalana nga pasakaan sang kaso nga pagbayolar sang RA 9165 ukon Comprehensive Dangerous Drugs Act of 2002.
SA KAANGOT NGA BALITA… Gindayaw ni Silay City Mayor Mark Golez ang madinalag-on nga buybust operation sang gintingub nga pwersa sang Silay City Police Station kag Talisay City PNP kun sa diin nakarekober sang P3.5 million nga balor sang iligal nga druga sa Menlo Village Phase 3, Barangay Zone 10 ciudad sang Talisay kahapon.
Madumduman nga subject sa operasyon ang duha ka mga babayi nga ginkilala kanday Ma. Del Mar Parojinog, 22-anyos kag Joana Lusabia, 20-anyos.
Kalakip man sa mga nadakpan amo sanday Romel Ferrer, 25-anyos; Jason Parojinog, 19-anyos nga asawa ni Ma. Del Mar; kag Homark Orquia, 27-anyos nga lunsay mga residente sang Barangay Mambulac, Silay City kag ginapatihan miyembro sang Divinagracia Drug Group.
Natigayon nga makuha sa paghinakop sang mga suspetsado ang dose ka mga heat sealed transparent plastic sachet sang suspected shabu lakip na ang buybust item kag duha pa gid ka bulto sang suspected shabu nga nagabalor sang P3.5 million.
Sa interview sang Bombo Radyo Bacolod kay Golez, ginpahayag sini nga iya gid ginadayaw ang accomplishment sang kapulisan kun sa diin dako nga balor sang iligal nga druga ang nakumpiskar.
Apang, ginkasubo man sang alkalde nga mga bataon pa ang mga suspetsado.
Nagpasalig man si Golez nga basta yara pa siya sa posisyon, lauman ang padayon nga patapna sang iligal nga druga sa ila nga ciudad.
