P3.75 million ang pondo nga gintalana sang Department of Social Welfare and Development Region 6 para sa emergency subsidy nga ipanagtag sa mga magagmay nga rice retailers sa kabug-usan nga Western Visayas.
Sa interview sang Bombo Radyo kay Atty. Carmelo Nochete, regional director sang DSWD Region 6, all set na ang DSWD sa pagdistribute sang subsidy sa mga magagmay nga rice retailers.
Suno diri, ang DSWD naghatag sang pondo nga P3.75 million naggikan sa Sustainable Livelihood Program para sa 250 ka mga recipients nga magabaton sang tag P15,000 kada isa.
Ini nakabase sa lista nga ginghatag sang Department of Trade and Industry (DTI).
Pahayag ni Nochete, dako ang nangin epekto sang price regulation sa mga retailers, gani nagpasalig ini nga kun ano man ang sarang sang departamento nga mabulig sa mga reatilers, ila ini ihatag.
Bwas nga adlaw, Setyembre 13 maga-umpisa na ang pagpanagtag sang subsidy sa ciudad sang Bacolod kag probinsya sang Negros Occidental kag ciudad kag probinsya sang Iloilo.
Samtang sa Setyembre 14 naman ang natalana nga adlaw para sa distribution sang subsidy sa Aklan, Capiz, Antique kag Guimaras.
Ginalauman sini ang matawhay nga lakat sang pagpanagtag sa pagkoordinar sa DTI, DSWD, Local Government Units kag Philippine National Police.
