Aprubado na sa 3rd and final reading sa Sangguniang Panlungsod sang Bacolod ang P3 billion nga annual budget sang ciudad para sa tuig 2020.
Nahibaluan nga nagsaka sang 12 porsyento ang pondo sang ciudad para sa masunod nga tuig kun ipaanggid sa subong nga 2019 nga may yara lamang sang P2.52 billion.
52% diri ang magahalin sa local taxes samtang 48% naman ang kuhaon sa internal revenue allotment.
Sa interview sang Bombo Radyo Bacolod kay Councilor Cindy Rojas, chairman sang committee on finance and appropriations, nalipay gid siya bangud dako nga bagay para sa Bacolod nga nagdangat sa P3 billion ang annual budget sini.
Suno diri, nagabuot-silingon lamang ini nga may yara sang progreso sa ciudad bangud mas nagakinahanglan ini sang mas dako nga pondo.
Samtang, luyag naman nga hugton ni Councilor Wilson “Jun” Gamboa ang pagpanukot sang mga buwis agud malab-ot ang projection nga P3 billion nga annual budget.
Suno kay Gamboa, nagakabalaka siya bangud basi indi malab-ot sang ciudad ang budget sa masunod nga tuig.
Apang, nagpasalig naman ang city treasurer’s office nga magahimo sila sang tikang agud mapanukot ang mga negosyo nga madugay na nga wala nagabayad sang buwis.
Nahibaluan nga yara pa lang sa first reading ang ginaduso nga local tax ordinance sang ciudad.
