Tres milyones pesos nga balor sang kwarta kag mga cheke ang ginaalegar nga ginkawat sa balay sang municipal treasurer sang Isabela sa Barangay Taculing diri sa ciudad sang Bacolod.
Ang municipal treasurer ang ginkilala kay Nenette Escarda kag nagapuyo sa Purok Jardin, Dona Juliana, Barangay Taculing, Bacolod City.
Sa interview sang Bombo Radyo kay Police Capt. Dax Santillan, station commander sang Bacolod Police Station 6, nagpapadulong si Escarda sa Metro Manila alas-4:30 sang Sabado sang kaagahon kag siya ang gindul-ong sang iya nag bana.
Apang pag-abot sang iya nga bana sa ila nga balay alas-6:00 sang aga, bukas na ang ila puluy-an kag gin-ukay ang ila kwarto.
Nagpauli si Escarda kag didto na natukiban nga wala na ang cash kag mga cheke nga ginapanag-iyahan sang LGU ang Isabela nga yara sa tiilan sang ila nga hiligdaan.
Suno sa treasurer, may CCTV camera ang ila nga balay apang wala ini nagaandar sang amo nga tinion bangud nagbrownout.
Nakabuhi man ang walo ka mga ido sang pamilya bangud bukas ang gate gani wala ini nakataghol.
Sa pag-usisa sang mga pulis, ginkakas sang mga suspetsado ang anom ka jalousie nga bintana nga amo ang ila gin-agyan.
Ang cash kag mga cheke ang gindala niya sa ila nga balay sang Biyernes kag igadeposit kuntani sini nga Lunes apang naunahan sang mga kawatan.
Suno kay Santillan, indi pa matumod kun pila ang mga suspetsado apang magasugod ang ila nga imbestigasyon sa anggulo nga may nangawat ukon wala.
