Aprubado na sang Monetary Board sang Bangko Sentral ng Pilipinas ang loan sang Bacolod City government sa Development Bank of the Philippines.
Kahapon sang hapon sang gin-aprubahan sang Monetary Board ang P4.4 billion loan.
Suno kay City Councilor Jude Thaddeus Sayson, chairperson sang committee on finance sa Sangguniang Panlungsod, mismo si Mayor Alfredo Benitez ang nagfollow up sa Monetary Board kag kahapon naggwa ang approval sini.
Gintalakay naman sa session sang Sangguniang Panlungsod subong nga hapon ang appropriation ordinance agud nga makapatigayon sang bidding ang executive branch.
Prayoridad sa mga proyekto ang pagbakal sang dugang nga lote para sa sanitary landfill agud nga ini ang mapalapad.
Suno kay Sayson, sa Barangay Felisa lang pwede makabutang sang sanitary landfill bangud amo ini ang gin-aprubahan sang Department of Environment and Natural Resources.
Suno sa iya, kadugay sang proseso antes ang approval sang DENR kun mabakal sang lote sa iban nga bahin sang ciudad.
Ikaduha sa mga priority projects amo ang pagpatindog sang legislative building kag rehabilitation sang Bacolod City Health Office.
