Masobra P41 million nga balor sang suspected shabu ang nakumpiskar sa 28 anyos nga lalaki nga subject sang drug buybust operation sa Purok Malipayon, Brgy. 35, Bacolod City, pasado alas-8:00 sang gab-i, Martes, August 13.
Suno kay Police Captain Glenn Soliman, officer in charge sang Regional Drug Enforcement Unit (RDEU) nga amo ang nagpatigayon sang buybust operation, ginbaklan sang P60,000 nga illegal nga druga si John Philip Dellomo, alias ‘Tol’.
Sang na-consummate na ang buybust, narekober pa gid sa iya possession ang 6,080 grams ukon masobra anom ka kilo sang suspected shabu nga may standard drug price nga P41,344,000.
Suno kay Soliman, ila ginkakibot ang dako nga volume sang illegal drugs nga ila nakuha nga suno kay Philip ginpatago lamang sa iya.
Samtang, arestado man ang utod ni Philip nga si Ronel Dellomo kag amay sini nga si Lauro Dellomo bangod sa obstruction of justice samtang ginapatigayon ang operasyon.
Sa karun yara na sa kustodiya sang Bacolod Police Station 1 ang tatlo ka naaresto.
Nahibaluan nga may yara man sang kaso si Philip nga pagpangawat apang padayon pa ang imbestigasyon sa background sang suspek kag ginapadalman man ang paghibalo kun diin ini nagakuha sang supply.
