![](https://img.bomboradyo.com/bacolod/2019/07/P5-M-shabu-nakumpiskar-4-arestado-sa-buybust-op-sa-Alijis.jpg)
Masobra P5 million nga balor sang suspected drugs ang narekober sang Police Station 3 sa buybust operation sa Brgy. Alijis, ciudad sang Bacolod pasado alas-3:00, Huwebes sang kaagahon.
Arestado sa nasambit nga operasyon ang apat ka mga persona kalakip ang subject nga isa ka high value target.
Ginkilala ang subject nga si Ryan Benemile alyas Tibo, 25-anyos sang Purok Paglaum, Brgy. 30, Bacolod.
Upod man sini nga naaresto sanday Chris John Esmedian, 29, sang Hacienda Najalin, Brgy. Nagasi, La Carlota; Alberto Pastera, 18, sang Purok Mapalaron, Brgy. 30, Bacolod kag Wegene Bagcal, 19, sang Cabuguason, Brgy. Mansilingan, BC.
Narekober sa operasyon ang isa ka medium heat sealed transparent plastic sachet kag apat ka large plastic sachet sang suspected shabu nga nagabaug-at sang kapin 405 grams kag ginabanta nagabalor sang P5,062,500.00.
Suno sa commander sang Police Station 3 nga si Police Major Ruel Culanag, ginsuguran nila ang transaksyon sa Bangga Subay, Brgy. Banago pasado alas-3:00 kahapon sang hapon tubtob nga natigayon ang operasyon sa Block 37, Lot 14, DC1, Brgy. Alijis, Bacolod City mga alas-3:45 kaina sang kaagahon.
Suno kay Culanag, wala sang trabaho ang subject kag ginahimo sini nga bagsakan ang iya balay sa Alijis.
Tsekyarun pa sang Station 3 ang impormasyon nga nakuha nila sa suspetsado nga halin sa Manila ang iya suplay.
Subong nga adlaw natalana ipaidalom sa inquest proceedings ang apat kag dal-on naman ang recovered items sa Negros Occidental Police Provincial Office (NOPPO) headquarters para ipaidalom sa laboratory tests.
Nahisayran kay Major Culanag nga may yara na sang chemist ang NOPPO nga amo ang magapatigayon sang laboratory test sa mga suspected drugs nga marekober sa mga buybust sa palibot sang probinsiya.