Liwat nga nagpanawagan si Agri Partylist Representative Wilbert Lee nga suportahan ang iya panawagan nga magamit ang nakatago nga pondo sang Philippine Health Insurance Corp. (PhilHealth).
Sa budget hearing sang Kongreso, ginpahayag ni Lee nga nagakaigo nga tion na agud mahatagan sang libre kag dekalidad nga healthcare system ang pungsod.
Pahanumdom sini nga P504 billion ang pondo sang PhilHealth nga nakadeposito lamang sa bangko.
Paathag sini nga kun indi gamiton ang pondo sang PhilHealth para sa health benefits sang publiko, mas maayo nga Phil Invest na lamang ang itawag sa ahensya.
Suno diri ang Department of Agriculture ang may-ara lamang sang P200 billion nga budget subong nga tuig, apang ang PhilHealth ang may nagasulobra nga budget, kun sa diin ang ginagastos lamang nila sa benefits claim kada tuig ang yara lamang sa P110 billion.
Dugang pa sini nga may subsidy pa nga P100 billion nga ginabatun ang ahensya gikan sa taxes, Philippine Amusement and Gaming Corporation (PAGCOR) kag Philippine Charity Sweepstakes Office (PCSO) samtang P40 billion naman nadugang gikan sa pagpasaka sang premium sang mga miyembro sang lima ka porsyento.
Sa tuman ka dako nga nabilin nga budget, nagapati si Lee nga masabat sang gobyerno ang pagpasaka sang coverage para sa mga malala nga balatian kaangay sang cancer sa 50 porsyento gikan sa karun nga 30 porsyento.
Kasubong man ang pagsabat sa chemotherapy kag dialysis.
Pahanumdom sang kongresista nga indi pwede nga installment ang pagpabulong sa balatian, kag sa kada adlaw madamo sang nagakapatay bangod sini.
Paathag ni Lee nga madamo sang mga pigado nga ginapili nga indi na lamang magpa-ospital bangod sa kahangawa sa gastos kag ang iban ang nahadlok nga malubong sa utang.
Panindugan sini nga kun indi pa masabat ang iya panawagan sa hearing sa Lunes, mapilitan ini nga idiffer ang budget.
Nagapati ini nga sarang gid maka-aprubar ang benefits committee bangod halos tanan sa mga miyembro ini ang yara man sa budget hearing.
