Ginpahayag sang isa ka witness gikan sa Anti-Money Laundering Council (AMLC) nga ang P560.5 million nga balor sang remittances nga nagbalik sa bank account ni suspended Leyte Representative Martin Romualdez sang ini ang nagserbe pa bilang House speaker ang wala sang kaangtanan sa flood control transactions.
Ini ang ginpahayag ni AMLC financial investigator Atty. Jan Mark Busa sa bail petition hearing ni Romualdez, nga nagapangatubang sang P7.4 billion plunder charge kaupod sanday former Ako Bicol party-list Representative Zaldy Co, personal assistant ni Romualdez nga si Joselyn Tragua Sereño, kag Felicito Cristobal Guevarra, presidente sang Samchan Foreign Exchange Corporation, angot sa gin-alegar flood control kickback scheme.
Sa cross-examination, ginpahayag ni Busa nga naka-monitor ang AMLC sang P560 million worth sang bank transactions sa bank account ni Romualdez humalin sang Setyembre 2022 tubtob Marso 2025.
Ginkumpirmar ni Busa nga ini ang wala sang kaangtanan sa flood control projects.
Samtang, ginpahayag ni Busa nga wala ma-trace sang AMLC ang mga money transfer sang isa ka kontratista kay Romualdez, kasubong man sang Department of Public Works and Highways (DPWH) ukon sang iya co-accused nga si Co.
Dugang pa, ginpahayag man ni Busa nga wala sang record sa AMLC nga nagpadala si Romualdez sang kwarta sa Golden Pheasant, ang kompanya nga gina-alegar gingamit ni Romualdez sa pagbakal sang isa ka propiedad nga nahamtang sa 30 Tamarind Road, South Forbes Park, Makati City.
Ang transaksyon ang gin-alegar ginpondohan paagi sa simulated dollar-to-peso transactions nga ginpatigayon ni Guevarra paagi sa Samchan.
