Nagdangat sa P59.42 million ang balor sang illegal nga druga nga nakumpiskar sang Police Regional Office 6 (PRO6) sa bulan sang Marso.
Sa interview sang Bombo Radyo Bacolod kay PRO6 spokesperson Police Lt. Col. Arnel Solis, nakumpiskar ang 8,681 grams sang suspected shabu nga may balor nga P59 million kag P 379, 360 nga balor sang marijuana sa bulan sang Marso.
Nagapanguna ang Iloilo Police Provincial Office (IPPO) nga may pinakadako nga nakumpiskar nga naglab-ot sa P25.6 million.
Ini ang ginasundan sang Iloilo City Police Office (ICPO) nga may P17.8 million kag Bacolod City Police Office (BCPO) nga may P7.89 million.
Samtang, 301 naman ka mga suspek ang naaresto sang kapulisan sang tinalikdan nga bulan.
Nagapanguna ang Negros Occidental Police Provincial Office (NOCPPO) nga may 105 nga naaresto; nga ginasundan sang Iloilo City Police Office (ICPO) nga may 69; Bacolod City Police Office (BCPO) nga may 50; Iloilo Police Provincial Office (IPPO) nga may 49; 10 sa Capiz Police Provincial Office; walo sa Aklan Police Provincial Office; anum sa Antique Police Provincial Office kag apat sa Guimaras Police Provincial Office.
Pahayag ni Solis, sa bulan sang Marso nagsaka ang nakumpiskar nga illegal nga druga apang may gamay lang nga deperensya sa numero sang mga naaresto nga suspetsado.
Suno diri, makit-an nga may yara sa gihapon sang mga naga-engage sa illegal drugs apang sila ang nadakpan nga nagapakita nga nangin successful ang police operations.
