Gin-aprubahan na sang bicameral conference committee ang final version sang 2025 General Appropriations Bill (GAB) nga naga-unod sang P6.352 trillion nga 2025 national budget.
Ginpahayag ni Senate President Pro Tempore Jinggoy Estrada, nga ang budget para sa Office of the Vice President ang magapabilin sa P733 million.
Madumduman nga ang proposed P2 billion budget ang gincut sang House of Representative sa P733 million bangod sa indi pagsabat ni Vice President Sara Duterte sa mga pamangkot sang mga Kongresista angod sa paggamit sang budget sang OVP, partikular na ang confidential funds.
Gin-adoptar man sang Senado ang budget cut sang Kamara apisar sa panawagan sang mga kaalyado ni Duterte nga ibalik ang proposed OVP funding nga natalana para sa mga social services.
Madumduman nga una na nga nagpahayag si VP Sara nga kapin 200 nga mga OVP personnel ang mahimo madulaan sang trabaho kun dayunon ang pagcut sang budget sang talatapan.
Suno diri, mahimo maapektuhan sa budget cut ang pila ka mga proyekto sang OVP kalakip na ang libre sakay kag mga financial assistance nga ginahatag sa mga satellite offices.
