Luyag nga mabatian ni Bacolod City Councilor Wilson Jun Gamboa Jr., convenor sang Amlig Tubig, sa patigayunon nga committee conference sang Sangguniang Panlungsod kun pila ang capital nga ipasulod sang Hiraya Water Corporation sa pagserbisyo sa ciudad, kag kun ano ang mga plano para ma-imprubar ang serbisyo.
Ginakwestyon niya ang inisyal nga pahayag nga maga-invest sang P6.7 billion ang Hiraya para sa tanan nga water distribution utilities nga ginsalo sini gikan sa PrimeWater Infrastructure Corporation.
Apang pahanumdom sang konsehal nga masobra 100 nga water distribution utilities ang pondohan nationwide, gani para kay Gamboa, kaladlawan ang nasambit nga kantidad.
Dugang pa niya nga ang gincommit sang PrimeWater sadto nga capital sa Bacolod ang nagdangat sa P2.5 billion ukon halos one-third na sang national budget sang Hiraya.
Pahanumdom pa ni Gamboa nga may mga outstanding obligation pa ang PrimeWater ukon balayran sa mga Bulk Water suppliers nga dapat isettle sang Hiraya.
