Nagdangat sa 12 ka sachet sang suspected shabu ang nakumpiskar sa isa ka 46 anyos nga lalaki sa ginpatigayon nga drug buybust operation sa Purok Sambag, Barangay 6, Kabankalan City.
Suno kay P/Lt Dennis Melgarejo, hepe sa Kabankalan City Police Station, ang suspetsado ang ginkilala kay Rey Calata, wala trabaho kag residente sa nasambit nga lugar.
Ini ang ginakabig na nga high value individual (HVI) kun sa diin ini ang nadakop pinaagi sa joint bubust operation sang Kabankalan City Police Station kag Philippine Drug Enforcement Agency – Regional Special Enforcement Team 6 (PDEA-RSET).
Suno kay Melgarejo, nadakop na sadto si Calata sa isa ka buybust operation sadtong tuig 2016 apang nadismiss ang iya nga kaso.
Sa padayun nga pagmonitor sa hulag sang suspetsado, ini ang napamatud-an nga nagapatigayon gihapon sa iligal nga transaksyon.
Ang 12 ka sachet sang suspected shabu kalakip na ang buybust item ang may kabug-aton nga 10 gramos kag ginabanta balor nga P68,000.// Nakuhaan man ini sang iban pa nga drug paraphernalia.
Sa karun, ginatutukan sang mga kapulisan ang pagtumod sa source sang suspetsado sang iligal nga droga kasubong man ang iban pa nga drug personalities nga konektado kay Calata.
Sa karun, ang suspetsado ang nakahunong na sa Kabankalan City Police Station kag natalana nga pasakaan sang nagakaigo nga kaso.
