Ginsuhestyon ni Cebu Governor Gwendolyn Garcia kay President Ferdinand “Bongbong” Marcos Jr ang sarang mahimo agud mapanaog sa P20 ang presyo sang bugas.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, si Presidente Marcos ang nagtambong sa Regional Development Council meeting sang Region 7 sa Cebu.
Apang ang mga gobernador gikan sa Region 6, 7, 8 kag Negros Island Region ang nagtipon man sa lugar agud ipakita ang suporta sa mga tinutuyo sang Presidente.
Aminado si Lacson nga indi tanan nga gobernador sa Visayas ang nagkadto, kun sa diin sa Western Visayas ang yara lamang amo ang gobernador sang Aklan kag Guimaras, apang kompleto naman ang gobernador sa Negros Island Region.
Pila sa mga agenda nga gintalakay sini ang mga programa sa edukasyon, climate change kag agrikultura.
Sa nasambitan nga meeting, ginsuhestyon ni Governor Garcia ang pagpanubo sa presyo sang bugas sa P20 pinaagi sa pagsubsidize sang gobyerno.
Suno diri, baklon sang gobyerno ang bugas sa local farmers sa balor nga P27 kag ini ang ibaligya sa balor nga P20.
Samtang ang subsidy ang tungaan naman sang National Government kag Provincial Government.
