Ginkalipay sang mga residente sang banwa sang La Castellana ang pag-abot ni First Lady Liza Araneta Marcos para maghatag sang ayuda sa mga biktima sang paglupok sang bulkan Kanlaon.
Kahapon, ginpangunahan sang first lady ang pagpanagtag sang bugas, medical kits kag mga family foodpacks, kag P10,000 cash sa kapin sa 1,200 ka mga benepisyaryo.
Ang aktibidad ang gin-updan man nanday Department of Health (DOH) Undersecretary Maria Rosario Vergeire, Department of Social Welfare and Developent (DSWD) Secretary Rex Gatchalian kag Department of the Interior and Local Government (DILG) Secretary Benjamin Abalos, Negros Occidental 5th District Congressman Dino Yulo kag Police Regional Office 6 Director Police Gen. Jack Wanky.
Sa venue, ginlimitahan naman ang pagsulod sang mga nakasuksok sang green, yellow kag pink nga panapton.
Wala naman naghatag pa sang mensahe ang first lady apang ini nagpalapit na lamang sa mga tawo kag isa-isa nga nagbugno sa ila.
Sa karun, padayon ang pagpanagtag sang ayuda sa mga biktima nga nagatinir sa mga evacuation centers bangod nga una nga ginhatagan ang mga biktima nga nakapauli na sa ila tagsa ka panimalay.
Samtang, nagpadulong man ini kahapon sa ciudad sang Bago kag nagduhol man sang bulig sa kapin sa 300 ka mga benepesyaryo.
Dako naman ang pagpasalamat ni La Castellana Mayor Rhummyla Nicor Mangilimutan, kag sa mensahae sini ang natabo nga paglupok sang bulkan naghatag sang kahadlok sa mga pumuluyo apang nangin mabakod ang tanan paagi sa pagpangamuyo kag bulig nga nag-abot.
Suno sa alkalde, dako ang bulig sang Local Government Unit sang Negros Occidental kasubong man sang probinsya.
Sa pag-abot naman ni First Lady Liza Araneta Marcos, nabatyagan sang tanan nga yara ang gobyerno para magbulig sa ila nga gina-atubang nga krisis.
