Ginapreparahan na sang Bacolod City Government kag developer sang Asenso Yuhum Housing Village sa Barangay Vista Alegre ang natalana nga pag-abot ni President Ferdinand “Bongbong” Marcos Jr.
Sa interview sang Bombo Radyo Bacolod kay Eva Marfil, Regional Director sa Department of Human Settlement and Urban Development sa Western Visayas, sa Enero 25 ang tentative date sa pagbisita sang Presidente agud pangunahan ang turn-over ceremony sang nagapanguna nga proyekto sa idalum sang Pambansang Pabahay para sa mga Pilipino (4PH) Program sang Marcos Administration.
Suno diri, makita naman ang natapos na nga una nga duha ka buildings nga ginabug-usan sang 128 units samtang on-going naman ang construction sang ikatatlo kag ikaapat nga building.
Sa karun, naka-issue na sang development permit samtang ginaproseso naman ang requirement para sa temporary license to sell.
