Nanawagan ang secretary general sang General Alliance of Workers Association (GAWA) sa gobyerno nga hatagan sang pagtamod ang problema sang pungsod kag indi ang pamulitika.
Sa interview sang Bombo Radyo Bacolod kay Wennie Sancho, kun magapadayon ang paghuyang sang peso batok sa dolyar kag ang pagsaka sang inflation, mahimo nga magresulta sang “economic meltdown”.
Kun sa diin suno diri, dako ang epekto sa mga mamumugon bangud indi na sila makasarang nga maghatag sang panginahanglanon sa ila tagsa ka pamilya.
Sa bahin sang impeachment case ni Vice President Sara Duterte, ginpahayag ni Sancho nga kun ma-impeach man ukon indi ang bise presidente, kinahanglan tutokan sang gobyerno ang problema sa ekonomiya kag indi ang pamulitika.
Suno diri, tubtob sa subong , wala sa gihapon may nabaton nga ayuda ang mga minimum wage earners kag wala man sang wage increase samtang nagapadayon lang pagsaka sang presyo sang mga balaklon.
Pahayag sini, apisar nga may rollback sa presyo sang produktong petrolyo, wala man sa gihapon nagnubo ang presyo sang mga balaklon.
Suno kay Sancho, dapat ang gobyero ang may mekanismo para sa ginatawag nga seguridad sang ekonomiya para sa ginalauman nga double digit inflation.
Pahayag sini nga tubtob sa subong, ang problema sang pungsod ang indi masolusyonan bangud ini ang natabunan sa drama sa senado.
