Ginpakamalaot sang Police Regional Office 6 ang pag-ambush sang mga miyembro sang New People’s Army sa patrol car sang Binalbagan Municipal Police Station sa Sitio Candida Dos, Barangay Bi-ao, Binalbagan kahapon sang aga.
Madumduman nga nagresponde ang mga pulis sa report nga may ginpatay sa Sitio Nursery, Barangay Bi-ao apang samtang pag-abot sa Candida Dos, naglupok ang roadside bomb.
Nafracture ang index finger sang deputy chief nga si Police Lt. Charles Richard Casalan samtang may pilas naman malapit sa mata si Police Corporal Julius Tranquillero samtang naigo naman sang stray bullet sa buli ang 15-anyos nga bata sang barangay kagawad kadungan sang pagbayluhanay sang luthang sang mga pulis kag sang mga rebelde.
Sa interview sang Bombo Radyo kay PRO 6 spokesperson Police Lt. Col. Arnel Solis, patraidor ang ginhimo sang rebelde nga grupo nga isa ka paglapas sa tawhanon nga kinamatarong kag may yara pa sang nasalabat.
Sa karon, ginaimbestigaran pa kun hungod ang pagpatay kay Jay-R Roso sa Sitio Nursery agud nga makaresponde ang mga pulis, apang nagagwa suno kay Solis nga planado ang ambush bangud nakatiempo pa ang mga rebelde nga magbutang sang anti-personnel mine sa Sitio Candida Dos.
Santo sa report, pila ka armado nga mga lalaki ang nagsulod sa balay sang tiyo ni Roso kahapon sang kaagahon kag diri ini ginpatay.
Aminado naman ang PRO 6 nga indi na ini bag-o sa hanay sang kapulisan bangud sang tuig 2017, nagresponde man ang mga miyembro sang Guihulngan City Police Station sa report nga may ginhold-up kag diri na sila gin-ambush sang NPA kun sa diin anom ka pulis ang nagkalamatay
Samtang,
Ginkondenar man sang 303rd Infantry Brigade ang pag-ambush sang mga miyembro sang New People’s Army sa patrol car sang Binalbagan Municipal Police Station sa Sitio Candida Dos, Barangay Bi-ao, Binalbagan kahapon sang aga.
Sa interview sang Bombo Radyo kay 303rd IB commander Brigadier General Inocencio Pasaporte, terroristic activity ang ginhimo sang mga rebelde.
Wala sang duda suno kay Pasaporte nga NPA ang may kahimuan sa krimen bangud wala man sang liwan nga grupo nga nagagamit sang improvised explosive device kundi ang komunista nga grupo.
Santo sa intelligence reports, ginapatihan suno kay Pasaporte nga mga miyembro sang Central Negros Front II ang may kahimuan sa ambush.
Nagpasalamat naman ang brigade commander bangud indi tuman ang halit sa mga kapulisan, wala naglupok ang duha ka IED kag nakabato pa ang mga ini.
Suno kay Pasaporte, matawhay na kuntani ang Binalbagan kun sa diin madugay na nga wala sang kaangay sini nga hitabo apang sa karon, ginhalitan naman sang NPA ang imahe sang Binalbagan bilang malinong nga lugar.
