Nagpadulong ang technical team sang Environmental Management Bureau (EMB)-Region VI sa banwa sang Candoni agud magpatigayon sang verification sa kontrobersyal nga conversion sang Hacienda Asia Plantations Incorporated (HAPI) sang 6,000 hectares nga duta sa banwa agud himuon palm oil plantation.
Sa interview sang Bombo Radyo Bacolod kay Forester Vicente Losbañes, pinuno sang Enforcement Division sang EMB-6, ginahulat nila sa karun ang application sang HAPI sang Environmental Compliance Certificate (ECC).
Suno kay Losbañes, ginahulat man nila ang segregation sang investigation sa Timberland and Agricultural land sa nasambit nga lugar para sa ECC application sang kompaniya.
Gin-athag man sini nga ang ECC ang indi permit kundi ini ang isa ka papel nga nagapamatuod nga ang nagdihon sang proyekto ang nagasunod sa Environmental laws.
Suno diri ang Department of Environment and Natural Resources (DENR) ang naka-issue sang Integrated Forest Management Agreement sa HAPI.
Ang kalaparon sang lugar nga ginahimo sa karun nga plantation ang nagdangat sa 6,652 hectares.
Nagpadala ang EMB sang team agud nga mahibaluan ang kalaparon sang lugar para sa forestry kag plantation.
Samtang wala pa nakaissue ang EMB sang Cease and Desist Order batok sa HAPI may kaangtanan sa ginahimo sang plantation sa nasambit nga banwa.
Nahibaluan nga si Negros Occidental Governor Eugenio Jose “Bong” Lacson ang may ginpadala nga sulat sa Environmental Management Bureau Region 6 nga nagahingyo sang pag-issue sang Cease and Desist Order batok sa HAPI may kaangtanan sa ginahimo sang plantation sa banwa sang Candoni, Negros Occidental.
