Indi mahapos para sa Israel Army ang pagbato sa militante nga grupo sang Hamas sa bahin sang Gaza bangod nga nahamtang sa idalum sang mga hospital kag buluthuan ang ila secret base.
Sa interview sang Bombo Radyo Bacolod kay Bombo International News Correspondent Cheryl Dalde direkta sa Tel Aviv, Israel, kalmado na ang sitwasyon sa South Israel apang amat-amat naman nga naga-umpisa ang konflikto sa North Israel.
Suno diri, ini gid lamang ang pinakamalala nga gamo nga iya naeksperyensyahan sa 16 ka tuig nga pagtinir sini sa Israel.
Aminado ini nga bisan naanad na ini nga makabati sang tunog sang siren, sang Sabado, tuman ang iya kahadlok sang nabatian ang siren kag paglinupad sang mga rocket.
Ginbuksan sini ang TV kag didto na nga nakita sini ang balita sa pag-atake sang Hamas.
Dugang pa niya, bisan wala pa ang Hamas may yara sang mga Arab nga nagapanghalit, kag kada tuig may yara gid sang bulan nga nagapanghalit ang mga ini.
Pahayag ni Dalde, natago sa idalum sang mga hospital kag mga buluthuan ang secret base sang Hamas amo nga indi mahapos ang pagsulod kag pagbato sang Israel.
Isa man sa rason kun ngaa indi dali-dali nga maka-atake ang Israel bangod nga gingamit sang militante nga grupo ang mga babayi kag bata bilang depensa.
