Nangin matawhay ang pag-atubangay ni Bacolod City Councilor Al Victor Espino kag transport group leader Wareen Jayson Gangoso kahapon.
Madumduman nga una nga nagsaka ang tensyon sa tunga sang duha sang nagpost sa social media ang lider sang Negros Panay United Transport Group sang pagpamahog nga kun dakpon ang mga unconsolidated jeepneys sa ciudad siya mismo magapadulong sa Bacolod kag pahalinon sa pwesto si Bacolod City Mayor Alfredo “Albee” Benitez kag Councilor Espino, pinuno sang Committee on Transportation.
Kahapon, nagpangayo si Gangoso sang pasaylo sa konsehal kag suno kay Espino, apology accepted na.
Pangabay ni Espino nga mangin reponsable sa kun ano man ang himuon nga makaapekto sa kaugalingon kag sa mga tawo nga ginarepresenta.
Dugang pa sini, may proposal pa nga kun luyag nila magpadalum sa lain nga palangabuhian sang sa mangin kabahin sang transport sector.
Pahayag sang konsehal, sa kada mag-umpisa ang adlaw ginapreparar sini ang iya intellectual kag physical capacity nga maayo man suno sa iya wala sang challenge nga natabo kay basi kun kalamayhati ang gwa sang pihak nga bahin.
Samtang, gin-athag naman ni Negros Panay United Transport Group leader Wareen Jayson Gangoso nga wala ini nagahilabot sa pamulitika sa Bacolod kag Iloilo kag luyag lang sini nga mapalab-ot ang sentimento sang iya grupo.
Aminado man ini nga sala ang iya nahimo nga pagpost sa social media.
Suno diri, iya lang ginalantaw ang sitwasyon sang mga transport groups bangod siya ang nangin operator kag driver man sadto.
