Ginarespeto sang provincial government sang Negros Occidental ang Department of Education sa indi pagpili sa probinsya bilang host sang Palarong Pambansa sa masunod nga tuig.
Nahibaluan nga probinsya sang Cebu ang nagdaog sa bidding agud nga mangin host sang Palarong Pambansa 2024.
Suno kay Provincial Administrator Atty. Rayfrando Diaz, ginarespeto sang Kapitolyo ang desisyon sang Department of Education bangud ini ang makapaayo sa hinampang.
Suno diri, ginpresentar sang provincial government ang tanan nga matanyag sang Negros Occidental kaangay sang venues kag iban nga support kaangay sang transportasyon, pagkaon, destinasyon kag trips gani indi makwestyon ang wisdom sang DepEd officials sa pag-award sang hosting sa Cebu City.
Suno kay Governor Eugenio Jose ‘Bong’ Lacson, indi dapat magbatyag sang pagkanugon bangud may husto nga tion para sa Negros Occidental nga maghost sang biggest national games kag ini ang hulaton nalang.
Isa sa mga butang nga namensyon sa bidding amo ang peace and order.
Apang sa pagpakighinun-anon sang provincial government officials sa leadership sang Armed Forces of the Philippines kag Philippine National Police, ila ginpasiguro sa DepEd secretary nga malinong ang Negros Occidental kag manami magpuyo diri.
Suno kay Diaz, ang anuman nga intelligence angot sa peace and order nga ginrequire ang gin-relay sa DepEd gani nagapati ini nga indi ini isa sa mga rason nga wala ginhatag sa Negros Occidental ang hosting.
