Aprubado na sang Sangguniang Panlalawigan ang isa ka provincial ordinance nga permanente nga nagadumili sa pagsulod sang buhi nga baboy kag pork products sa probinsiya gikan sa Luzon kag sa iban nga mga pungsod nga apektado sang African Swine Fever (ASF).
Suno kay Provincial Veterinarian Dr. Renante Decena, mapabaskog sang ordinansa ang inspeksyon sang Task Force ASF sa mga seaports kag airports kun sa diin ang mga makalusot ang patigayunan sang hot pursuit operation kag may yara pa sang penalidad nga ihatag sa magabayolar diri.
Nahibaluan nga sa executive order nga ginpagwa ni Governor Eugenio Jose Lacson sang nagligad nga Setyembre, ginabalik lamang ang mga pork products sa ginhalinan sini ukon ginakumpiskar sang Task Force ASF kag ginasunog ukon ginalubong.
Suno kay Decena, nalipay siya sa tikang nga ginhimo sang probinsiya batok sa ASF.
Samtang, gin-aprubahan man sang provincial board ang joint resolution nanday 3rd District Board Member Andrew Montelibano kag 2nd District Board Member Sixto Teofilo Roxas Villena “Pal” Guanzon Jr. nga naga-deklarar sa Negros Occidental bilang ASF-Free.
Kasunod sini, magapatigayon ang probinsiya sang public boodle fight kun sa diin makaon sang lechon baboy.
Tinutuyo sini nga ipakita nga hilway sa nasambit nga virus ang mga baboy sa Negros Occidental.
