(Update) BACOLOD CITY — Nagpasalig ang Corazon Locsin Montelibano Memorial Regional Hospital nga ipagwa nila ang resulta sang imbestigasyon may kaangtanan sa reklamo sang isa ka amay nga napatay ang iya anak matapos ginbalibaran nga iadmit sa balay-bululngan.
Nahibaluan nga nagreklamo sa Bombo Radyo si Manuel Mercano sang Barangay Sum-ag, Bacolod City kag iya ginpahayag nga nagkadto sila sa CLMMRH sang Marso 14 apang Marso 17 pa gin-admit ang anak nga si Neil nga gintunaan sang iya kamatayon.
Sa interview sang Bombo Radyo, ginpahayag ni John Michael Gabriel Zaragosa, pinuno sang Public Information and Assistance Desk sang CLMMRH, nga nagkadto sa ila opisina ang amay nga Mercano kahapon kag ginhatag naman nila ang pangalan sang ginareklamo nga doktor.
Bangud sa reklamo, ginpatigayon na sang mga consultants sang CLMMRH ang preliminary investigation.
Sa sini nga mga tinion suno kay Zaragosa, lunsay pa lang mga akusasyon ang pasuni ni Mercano.
Una na nga ginpahayag ni Mercano nga ginpamilit sang doktor nga wala sila nagabaton sang pasyente nga wala nagakaon kag nagaligid nalang.
Suno kay Zaragosa, ipagwa nila ang resulta sang imbestigasyon makalipas ang tatlo ka adlaw humalin sang ginsuguran ang pag-usisa.
