Ginkumpirmar sang regional director sang Overseas Workers Welfare Administration (OWWA) Region 6 nga ginpermahan na kahapon ni Governor Eugenio Jose “Bong” Lacson ang pag-establish sang Provincial Council on Migration and Development sa Negros Occidental nga mangin instrumento sang programa sang probinsya para sa mga Overseas Filipino Workers (OFW) kag ila mga dependents.
Sa interview sang Bombo Radyo kay OWWA Region 6 OIC Rizza Joy Moldes, ginpahayag sini nga kahapon, may nareleasan na ang OWWA sang insurance sa mga benepisyaryo sang OFW.
Suno kay Moldes, sa mga nagtaliwan nga OFW bangud sa natural death, magabaton ang ila pamilya sang P120,000 samtang P220,000 naman kun aksidente ang gintunaan sini.
Para sa mga OFW nga nadulaan sang kabuhi abroad bangud sa COVID-19, magabaton sang P120,000; P15,000 nga livelihood asssistance; kag scholarship para sa iya mga kabataan.
Suno sa OIC, may yara sang tatlo ka mga Negrosanon OFWs ang nagtaliwan bangud sa COVID-19 samtang walo naman sa bilog nga Region 6.
Sa karun, nagdangat na sa P136 million ang financial assistance nga nahatag sang OWWA sa kapin 13,000 ka mga OFWs nga nagpauli sa Western Visayas humalin sang nagsugod ang pandemic.
